Yasamalda çörək emalı müəssisəsinin fəaliyyəti dayandırılıb
Bakının Yasamal rayonunda çörək emalı müəssisəsində plandankənar yoxlama aparılıb, antisanitar şərait və qeydiyyatsız fəaliyyət aşkarlanıb. Nöqsanlar aradan qaldırılanadək müəssisənin işi dayandırılıb.
Azərbaycan Respublikası Qida Təhlükəsizliyi Agentliyinin əməkdaşları Bakının Yasamal rayonu, 7-ci sallaqxana küçəsi 7A ünvanında fiziki şəxs Cavadlı Cəfər Zabit oğluna məxsus çörək emalı müəssisəsində plandankənar yoxlama keçirib. Yoxlama zamanı qida təhlükəsizliyi sahəsində texniki normativ hüquqi aktların tələblərinin pozulması faktları müəyyən edilib.
Agentliyin məlumatına görə, müəssisə antisanitar şəraitdə və qeydiyyatdan keçmədən fəaliyyət göstərib, texnoloji ardıcıllıq prinsiplərinə əməl olunmayıb. İstehlak üçün nəzərdə tutulan çörəklərin polimer qablaşdırmalarda antisanitar vəziyyətdə saxlandığı da qeydə alınıb.
Nöqsanlarla bağlı inzibati protokol tərtib edilib, müəssisənin fəaliyyəti nöqsanlar aradan qaldırılanadək dayandırılıb.