Türkiyədə xarici rezervasiya platformaları üçün qanun layihəsi komissiyadan keçdi
Booking, Expedia və Airbnb kimi xarici platformalara icazə, Türkiyədə təmsilçi və vergi öhdəliyi gətirən qanun layihəsi komissiyada qəbul edilib; qanunlaşarsa 1 yanvar 2027-ci ildə qüvvəyə minəcək.
Türkiyə Böyük Millət Məclisinin Bayındırlıq, İmar, Nəqliyyat və Turizm Komissiyası xarici rəqəmsal yerləşdirmə platformaları haqqında qanun layihəsini qəbul edib. Layihə Booking, Expedia və Airbnb kimi platformalara icazə sənədi almaq, Türkiyədə təmsilçi saxlamaq, turizm payı və rəqəmsal vergi ödəmək öhdəliyi qoyur. Sənəd Baş Məclisdə müzakirə olunacaq və qanunlaşarsa 2027-ci il yanvarın 1-dən qüvvəyə minəcək.
Layihə daxili satışlarda komissiyaya 17 faiz yuxarı hədd müəyyən edilməsini nəzərdə tutur. Rəqəmsal platformalar vasitəsilə edilən rezervasiyalarda yerləşdirmə xidmətinə aid ƏDV və stopajı bəyan etmək və ödəmək öhdəliyi xidməti göstərən otelin üzərinə düşəcək.
Mədəniyyət və Turizm Nazirinin müavini Nadir Alpaslan bildirib ki, istehlakçının hüququnu qoruyan, qeydiyyatlı müəssisələri nəzərə alan və haqsız rəqabətin qarşısını almağı hədəfləyən hüquqi çərçivə yaradılır.
Azərbaycanda otel və qonaq evlərinin böyük hissəsi sifarişləri məhz bu platformalar üzərindən alır. Türkiyədə tətbiq olunacaq təmsilçi və vergi öhdəliyi modeli bölgədə oxşar tənzimləmə müzakirələri üçün istinad ola bilər.