Turizm və otel işçiləri üçün insan alveri riskləri üzrə təlim keçirilib

Dövlət Turizm Agentliyinin təşkilatçılığı ilə oktyabrın 30-da turizm sənayesi nümayəndələri üçün insan alveri risklərinin müəyyənləşdirilməsi və bu cür hallara düzgün reaksiya verilməsi mövzusunda təlim keçirilib. Tədbirdə Daxili İşlər Nazirliyinin İnsan Alverinə Qarşı Mübarizə Baş İdarəsinin əməkdaşı Emin Əsədov, İnsan Alveri ilə Mübarizə üzrə QHT Koalisiyasının sədri Mehriban Zeynalova, koalisiyanın üzvləri Mahirə Əmirhüseynova və Ağamirzə Bağırov çıxış ediblər.

Təlimin məqsədi otel və turizm şirkətlərinin işçilərinin insan alverinin mümkün əlamətlərini tanımaq, riskli vəziyyətləri vaxtında görmək və belə hallarda təhlükəsiz davranmaq bacarıqlarını artırmaq olub. İştirakçılara insan alverinin mahiyyəti, istismar formaları və müvafiq hüquqi çərçivə barədə məlumat verilib.

Proqramda otel və turizm müəssisələrinin gündəlik işində rast gəlinə biləcək nümunələr əsasında risklərin aşkarlanması nəzərdən keçirilib. Qonaqların qeydiyyatı, otaq xidməti, restoran, transfer və turizm xidmətlərinin təşkili zamanı müşahidə oluna biləcək şübhəli hallar izah edilib — o cümlədən şəxsin sərbəst hərəkətinə maneələrin olması, sənədlərinin başqa şəxs tərəfindən saxlanılması və istismar ehtimalını göstərən digər əlamətlər.

İştirakçılara şübhəli vəziyyətlə qarşılaşdıqda müstəqil araşdırma aparmamaq, ehtimal olunan qurbanı təhlükəyə atmamaq, qarşıdurmadan çəkinmək və məlumatı aidiyyəti qurumlara çatdırmaq tövsiyə olunub. Uşaqlarla bağlı risk əlamətlərinin müəyyənləşdirilməsi və belə hallarda ehtiyatlı davranışın vacibliyi də vurğulanıb. Təlim interaktiv formada keçirilib və sənaye nümayəndələrinin sualları cavablandırılıb.