Pakistanlı influenserlər üçün Bakı, Gəncə, Şuşa və Xankəndiyə infotur təşkil edilib

Dövlət Turizm Agentliyi Pakistanın 10 influenserini Azərbaycana infotura gətirib. Agentliyin AZƏRTAC-a verdiyi məlumata görə, səfər Bakı, Gəncə, Şuşa və Xankəndini əhatə edib və iştirakçılara ölkənin müxtəlif turizm istiqamətləri barədə məlumat verilib.

Proqram çərçivəsində qonaqlar Bakının müasir şəhər mühiti, Gəncənin tarixi və mədəni irsi ilə tanış olub, şəhərlərin memarlıq nümunələri və milli-mədəni dəyərləri barədə məlumatlandırılıblar. “Böyük Qayıdışa dair Dövlət Proqramı” çərçivəsində təşkil olunan səfərdə iştirakçılara Qarabağ və Şərqi Zəngəzurun tarixi və mədəni əhəmiyyəti, bölgədə aparılan bərpa və yenidənqurma işləri, formalaşan turizm infrastrukturu izah edilib.

İnfoturun məqsədi Pakistan auditoriyasında Azərbaycanın turizm imkanları barədə məlumatlılığı artırmaq, paytaxtla yanaşı digər şəhər və bölgələrə marağı təşviq etməkdir. İştirakçıların təəssüratlarını öz rəqəmsal platformalarında paylaşması ilə ölkənin turizm istiqamətlərinin daha geniş auditoriyaya çatdırılması nəzərdə tutulur.