Hesabat: 2036-cı ilədək Azərbaycanda xarici turist gecələmələri 116 faiz arta bilər

"Accor" mehmanxanalar qrupu tərəfindən sifariş edilmiş və "Tourism Economics" şirkətinin proqnozlarına əsaslanan "2036-cı ilədək Avropanın turizm xəritəsinin dəyişən siması" adlı hesabat Azərbaycanı xarici turistlərin gecələmələrinin artım tempinə görə yüksək potensiallı ölkələr sırasına daxil edib. Rumıniyanın "Afaceri.news" və "Mediafax" nəşrləri hesabatın nəticələrini işıqlandırıb.

Proqnoza görə, 2026–2036-cı illərdə Azərbaycanda bu göstərici 116 faiz artacaq. Müqayisə üçün eyni dövrdə Latviyada 83, Rumıniyada 82, Macarıstanda 80, Kiprdə 75, Litvada 72, Xorvatiyada isə 68 faiz artım gözlənilir.

Hesabat Avropanın ümumi mənzərəsini də göstərir: qitədə turistlərin yerləşdirilməsinə tələbatın 32 faiz artacağı, bunun nəticəsində illik gecələmələrə əlavə 1,6 milyard gecələmənin daxil olacağı gözlənilir. Beynəlxalq turistlərin gecələmələri 42, daxili turizm üzrə isə 24 faiz artacaq. Yaxın Şərqdən gələn turistlərin sayında 93, Asiya regionundan gələnlərdə 88 faiz artım proqnozlaşdırılır.

2025-ci ildə Avropa 810 milyon beynəlxalq turist qəbul edib — bu, dünya üzrə axının 53 faizidir. Turizmdən gəlirlər 700 milyard avronu ötüb. Xarici turistlərin ümumi xərclərinin 2026-cı ildəki 825 milyard avrodan 2036-cı ildə 1,3 trilyon avrodan çox səviyyəyə yüksələcəyi gözlənilir. Ekspertlər artımı nəqliyyat əlaqələrinin yaxşılaşması, turizm infrastrukturuna investisiyalar və yeni istiqamətlərə marağın artması ilə əlaqələndirirlər.

Azərbaycanın bu siyahıda yüksək templə görünməsi Bakı və regionlardakı otel və qonaq evləri üçün birbaşa siqnaldır: yataq tutumuna, xidmət keyfiyyətinə və kadr hazırlığına indidən yatırım edən obyektlər artan axından daha çox pay götürəcək.