Gəncə Regional Turizm Şurası ilk iclasını keçirib

Oktyabrın 30-da Gəncə şəhərində Gəncə Regional Turizm Şurasının ilk iclası keçirilib. Şura Gəncə şəhəri ilə yanaşı Göygöl, Daşkəsən, Gədəbəy, Samux, Şəmkir, Qazax, Ağstafa və Tovuz rayonlarını əhatə edir.

İclasda həmin ərazilərdə fəaliyyət göstərən dövlət qurumlarının yerli strukturlarının nümayəndələri, eləcə də turizm sektoru ilə əlaqəli dövlət qurumlarının təmsilçiləri iştirak ediblər. Rayon icra hakimiyyəti başçılarının müavinləri çıxış edərək Şuranın yaradılmasının Qərb regionunun sosial-iqtisadi inkişafına və yerli turizm potensialından daha səmərəli istifadəyə töhfə verəcəyini vurğulayıblar.

Dövlət Turizm Agentliyi sədrinin müşaviri, Şuranın sədri Kənan Quluzadə Şuranın yaradılma məqsədləri və fəaliyyətinin hüquqi çərçivəsi barədə məlumat verib. O, təşəbbüsün dövlət qurumları arasında əməkdaşlığın gücləndirilməsinə və turizm sahəsində əlaqələndirmənin təkmilləşdirilməsinə xidmət etdiyini bildirib. Quluzadə həmçinin 2026–2030-cu illər üçün turizmin inkişafına dair Dövlət Proqramının mahiyyəti və ondan irəli gələn vəzifələr barədə danışıb.

İclasda regionların inkişafına dair “Təkliflər Planı”ndakı istiqamətlər — turizmdə əlçatanlıq və infrastruktur, turizm məhsulları və təcrübələri, marketinq, təbliğat və rəqəmsallaşma, sənayenin inkişafı, insan resursları və keyfiyyət standartları — və əsas icraçı qurumların görəcəyi işlər diqqətə çatdırılıb.

Agentliyin Mədəni irs və regional turizm şöbəsinin müdiri Elgün Cavadov Şuraların yerli turizm potensialının üzə çıxarılması və vahid yanaşma əsasında rəqabətqabiliyyətli turizm məhsullarının yaradılması baxımından əhəmiyyətini qeyd edib.