Azərbaycan və Mərkəzi Asiya ölkələri birgə bəyannamə imzaladı
Türkmənbaşında Dövlət Başçılarının 8-ci Məşvərət görüşündə imzalanan Birgə Bəyannamədə turizm, nəqliyyat və rəqəmsal əməkdaşlıq sahələrində sıx işbirliyinin vacibliyi vurğulanıb.
Türkmənbaşında Azərbaycan Respublikası və Mərkəzi Asiya Dövlət Başçılarının 8-ci Məşvərət görüşü keçirilib və yekunda Birgə Bəyannamə imzalanıb. Sənəddə Azərbaycanın bu platformada tamhüquqlu iştirakı, həmçinin 2026-cı il oktyabrın 15-də Bakıda keçiriləcək AQEM-in 7-ci Sammitinə hazırlıq yüksək qiymətləndirilib.
Bəyannamədə tərəflər ticarət-iqtisadi əlaqələrin, investisiyaların, biznes forumların, kiçik və orta sahibkarlığın və elektron ticarətin inkişafını dəstəklədiklərini bildiriblər. Nəqliyyat sahəsində Şərq–Qərb və Şimal–Cənub dəhlizləri də daxil olmaqla tranzit-nəqliyyat infrastrukturunun inkişafı prioritet elan edilib.
Sənəddə mədəni-humanitar, idman, turizm və gənclər siyasəti sahələrində sıx əməkdaşlığın vacibliyi də qeyd olunub.
Enerji sahəsində Azərbaycan, Qazaxıstan və Özbəkistan arasında Mərkəzi Asiyadan Azərbaycan vasitəsilə Avropaya yaşıl enerjinin ixracını nəzərdə tutan layihənin önəmi vurğulanıb. Həmçinin Azərbaycanda yaradılan Beynəlxalq Telekommunikasiya İttifaqının Regional Akselerasiya Mərkəzinin rəqəmsal innovasiyalar və startapların inkişafındakı rolu alqışlanıb.